Dioplóma Iarchéime sa Ghaeilge do Mhúinteoirí
Fáilte
Aidhmeanna
Tá Coláiste na Tríonóide, Baile Átha Cliath, in éineacht le hInstitiúid Oideachais Marino, chun clár nuálach dhá bhliain a thairiscint atá dírithe ar scileanna múinteoirí cláraithe iar-bhunscoile sa Ghaeilge a fheabhsú. Beidh rannpháirtithe an chláir in ann clárú chun an Ghaeilge a mhúineadh go dtí leibhéal na hArdteistiméireachta i scoileanna tar éis dóibh an clár a chur i gcrích go rathúil.
Cuirfear an clár páirtaimseartha seo, a thosóidh mí Eanáir 2025, ar fáil ar bhealach solúbtha agus nuálaíoch chun rannpháirtíocht leathan a chumasú, chun freastal ar mhúinteoirí i róil lánaimseartha agus pháirtaimseartha araon, chomh maith leo siúd atá lonnaithe ar fud na tíre.
Déanfar an clár a sholáthar ar bhealach a chuirfidh ar chumas rannpháirtithe tabhairt faoi eispéiris foghlama nua thar fhoghlaim duine le duine, ar líne agus bunaithe ar chleachtas.
Seisiún Eolais 2.10.2024
Beidh Webinar againn Dé Céadaoin 2.10.2024 ag 7pm - tabharfar gach eolas ar leagan amach an chúrsa agus beidh deis agaibh ceisteanna a chur sa bhoiscín Q&A. Fáilte roimh chách.
Faid
Maireann an cúrsa ar feadh dhá bhliain acadúil, ag tosú Mí Eanáir 2025, agus is cúrsa staidéir páirtaimseartha é.
Struchtúr freastail : Eolas le teacht
Iarratais
Is féidir gur isteach ar an gcúrs anois trí chóras iarratais Choláiste na Tríonóide. Seolfar an cúrsa i Mí Mheán Fómhair agus beidh oíche eolais dá cur ar fáil ar an 2 Deireadh Fómhair ag 7pm - ar líne.
Le cur isteach ar an gcúrsa, beidh fianaise ag teastáil go bhfuil iarrthóirí ag Leibhéal B1 den Teastas Eorpach sa Ghaeilge (TEG). Tá leibhéil éagsúla TEG bunaithe go ginearálta ar An Fráma Tagartha Comónta Eorpach do na Teangacha: Foghlaim, Teagasc agus Measúnú (Comhairle na hEorpa, 2001). Is féidir fianaise a fháil ó do Ollscoil má tá cáilíocht éigin agat cheana sa Ghaeilge, nó cuirfidh TEG scrúdú ar fáil mí na Samhna sa chaoi is go mbeadh na torthaí sin ar fáil in am le tabhairt faoin gcúrsa.
Beidh an scrúdú sin ar siúl ar an 23ú Samhain. Má bhíonn éileamh an-mhór air, cuirfear dáta breise ar fáil ar an 22ú Samhain. Táille EUR170 a bheidh ar an srúdú sin. Más mian leat go gcuirfeadh TEG eolas chugat faoin scrúdú, líon an fhoirm seo le do thoil roimh an 18ú Deireadh Fómhair:
Anuas ar sin, beidh na rudaí seo a leanas ag teastáil:
- cóip de do thras-scríbhinn acadúil (íosleibhéal de 2.2 sa Dioplóma Iarchéime nó sa Mháistreacht san Oideachas)
- CV reatha
- iarratas comhlánaithe go hiomlán (ar líne, nasc le teacht)
- fianaise go bhfuil tú cláraithe le Comhairle na Múinteoirí
Riachtanais incháilitheachta agus roghnaithe: tabharfar tús áite d’iarrthóirí bunaithe ar a dtaithí mar mhúinteoirí; ar a scileanna teanga; ar riachtanais na scoile (dearbhaithe ag an bpríomhoide).
Más mian leat fógra a fháil uainn nuair a bhíonn an córas iarratais oscailte, seol rphost chuig riarthóir an chúrsa, Caoimhe ní Bhraonáin, ag Dioploma.Gaeilge.Muinteoiri@tcd.ie.
Obair an chúrsa
Struchtúr an chúrsa: Cúrsa solúbtha páirt-aimseartha é an Dioplóma agus dearadh an sceideal do mhúinteoirí atá ag obair go lánaimseartha. Beidh idir léachtaí ar líne (65%) agus ar an láthair (35%) i gceist, sna tráthnónta, ar an Satharn agus le linn laethanta saoire scoile. Beidh tréimhse cónaitheach Gaeltachta i gceist mar chuid den chúrsa.
Bliain 1
- Dánta, stáitse agus scáileáin
- Cumarsáid agus litearthacht 1
- Curaclam agus comhthéacs
- Pobal agus teanga na Gaeilge
Bliain 2
- Oideolaíocht na Gaeilge
- Cumarsáid agus litearthacht 2
- Téacsanna Gaeilge trí na haoiseanna
- An Ghaeilge don Seomra ranga
- Fathaigh an phróis
Beidh 4 sheachtain san iomlán agaibh sa Ghaeltacht i rith thréimhse an chúrsa.
Eolas eile le teacht níos gaire do sheoladh an chúrsa.
Cuirfear leagan amach na modúl agus lámhleabhar an chúrsa ar fáil anseo in am tráth. Beidh oíche oscailte againn sa bhfómhar - más mian leat bheith ar liosta eolais don chúrsa, seol rphost chuig riarthóir an chúrsa, Caoimhe ní Bhraonáin, ag Dioploma.Gaeilge.Muinteoiri@tcd.ie.