Tá an próiseas iarratais do Scéim an Champais agus na Dara Bliana 2026-27 dúnta.

Osclófar arís é i mí an Mhárta/Aibreáin 2027 agus beidh an fhoirm iarratais ar fáil le híoslódáil ón leathanach seo.

Baineann an Scéim Cónaithe seo le mic léinn reatha i gColáiste na Tríonóide. Tá tuilleadh eolais faoin Scéim Cónaithe thíos.

Baineann dhá chuid leis an Scéim Cónaithe seo:

a) Scéim Cónaithe an Champais: do mhic léinn fochéime sa dara, tríú agus ceathrú bliain (12 spás).

b) Scéim Cónaithe na Dara Bliana i Halla na Tríonóide: do mhic léinn fochéime sa dara bliain amháin (6 spás). 

Eolas Ginearálta faoin Scéim Cónaithe

Is iad Oifig na Gaeilge agus Coiste na Gaeilge a riarann an Scéim i gcomhar le Cláraitheoir na Seomraí d’fhonn úsáid na Gaeilge a chur chun cinn i saol na hollscoile. Leis seo, cuirtear lóistín lán-Ghaeilge ar fáil do mhéid áirithe mac léinn a ghlacann le agus a chomhlíonann coinníollacha na Scéime.

Bítear ag lorg mic léinn a bhfuil Gaeilge líofa acu, atá sásta í a labhairt san árasán ar bhonn laethúil agus a thacóidh le himeachtaí Gaeilge. Ní mór do gach mac léinn táillí iomlána na cóiríochta a íoc ach cuirtear deontas €1,000 an duine ar fáil ar chomhlíonadh choinníollacha na Scéime. Íoctar leath den deontas i ndiaidh Théarma na Féile Michíl agus an leath eile ag deireadh na bliana acadúla.

Ní mór iarratas ar leithligh a dhéanamh, lasmuigh den iarratas ar an Scéim Cónaithe, leis an Oifig Cóiríochta dá mba mhaith le mac léinn maireachtáil ar an gcampas nó i Halla na Tríonóide. Sa chaoi sin mura n-éiríonn leo áit a fháil ar an Scéim, beidh deis acu go fóill spás a fháil i lóistín na hollscoile. Tá tuilleadh eolais ar chóiríocht Choláiste na Tríonóide le fáil ag an nasc seo.

Is féidir spás a thairiscint don dara huair ar líon teoranta mac léinn a bhí ar an Scéim cheana ach ní féidir áit a bhaint amach ar an Scéim níos mó ná dhá uair.

An Chóiríocht

a) Bá na Luibheolaíochta ar champas Choláiste na Tríonóide

• Tá dhá spás déag ar fáil ar Scéim an Champais do mhic léinn fochéime sa dara, tríú nó ceathrú bliain in aon chúrsa staidéir.
• Tá sé árasán (lonnaithe i mBá na Luibheolaíochta de ghnáth) i gceist, agus maireann beirt mhac léinn i ngach árasán (d'fhéadfadh meascán inscní a bheith i gceist).
• Tá a s(h)eomra codlata singil féin ag gach mac léinn. Roinntear an seomra folctha agus an chistin/seomra suite.

b) Halla na Tríonóide, Dartraí, Baile Átha Cliath 6

• Tá 6 spás ar fáil do mhic léinn fochéime sa dara bliain in aon chúrsa staidéir.
• Beidh an seisear mac léinn in aonárasán amháin le chéile (d'fhéadfadh meascán inscní a bheith i gceist).
• Beidh seomra codlata singil agus seomra folctha dá gcuid féin ag gach mac léinn. Roinnfidh an seisear mac léinn an chistin/seomra suite.
• Níl sé ceadaithe do mhic léinn a bhfuil seoladh baile acu i mórcheantar Bhaile Átha Cliath iarratas a dhéanamh ar spás Scéime i Halla na Tríonóide.

An Próiseas Iarratais

Márta/Aibreán

Osclaítear an próiseas iarratas agus tugtar cuireadh do mhic léinn foirm iarratais a líonadh.

Aibreán/Bealtaine

Déantar gearrliostú ar na hiarratais agus tugtar cuireadh chun agallaimh do na mic léinn a bhaineann amach áit ar an ngearrliosta.

Tar éis na n-agallamh, roghnaítear dháréag mac léinn do Scéim an Champais agus seisear mac léinn do Scéim na Dara Bliana (18 mac léinn in iomlán) agus ofrálfar spás i lóistín Choláiste na Tríonóide do na mic léinn sin.

Déan teagmháil le gaeloifig@tcd.ie má bhíonn aon cheist agat.

Lean Oifig Gaeilge Choláiste na Tríonóide ar na meáin shóisialta:

@GaeloifigTCD / @GaeloifigTCD / @GaeloifigTCD