Baile
An Bailiúchán Ealaíne
Tá traidisiún 300 bliain ag Coláiste na Tríonóide Baile Átha Cliath maidir le saothar ealaíne a choimisiúnú agus a bhailiú. Is le 1710 a bhaineann an taifead ar phictiúir is sine dar fios dúinn sa Choláiste, agus is le 1601 a bhaineann an saothar is túisce. Tá na bailiúcháin sin níos sine ná cinn Chumann Ríoga Bhaile Átha Cliath, a bunaíodh i 1731, agus b’ann dóibh sular bunaíodh Gailearaí Náisiúnta na hÉireann le hAcht Parlaiminte in 1854 agus a osclaíodh in 1864. Pictiúir, priontaí, dealbhóireacht agus dealbha atá sna bailiúcháin, go príomha, agus tá béim mhór stairiúil ar phortráidíocht.
George Dawson, ollamh le Géineolaíocht, a chuir tús leis an mbailiúchán nua-aimseartha i 1959 nuair a thug sé féin agus grúpa mac léinn an scéim fruilithe ‘Gailearaí an Choláiste’ isteach. Chuathas i mbun saothar ealaíne bunaidh ó Éirinn agus ó thíortha eile, chomh maith le priontaí agus póstaeir bunaidh ealaíontóirí a fháil go gníomhach le taispeáint i seomraí mac léinn agus foirne ar an gcampas le suim sa nua-ealaíon agus san ealaíon chomhaimseartha, agus le tuiscint chriticiúil orthu a spreagadh. Mhúscail an scéim sin an oiread sin suime ar fud an Choláiste agus lasmuigh de, gurb é ba chúis le cur chun cinn, tacaíocht agus rannpháirtíocht chomhfhiosach sna físealaíona i gColáiste na Tríonóide trí shaothair a fháil, a choimisiúnú agus a thaispeáint, trí chumainn na mac léinn, trí roinn teagasc ghaolmhar a bhunú, agus trí nuachóiriú aeistéiticiúil a chur ar thimpeallacht an champais.
Chun tuilleadh eolais a fháil, féach anseo le do thoil:
George Dawson:An Unbiased Eye. Modern and Contemporary Art at Trinity College Dublin since 1959, eagarthóir Catherine Giltrap (Baile Átha Cliath: Eagráin Bhainteacha, 2010) Ar fáil i Siopa Leabharlainne Choláiste na Tríonóide, Hodges Figgis, agus i siopa leabhar an IMMA, i measc siopaí eile. Ar fáil ar líne ó na foilsitheoirí freisin: Associated Editions
Paintings and Sculptures in Trinity College Dublin le Anne Crookshank agus David Webb (Baile Átha Cliath: Preas Choláiste na Tríonóide Bhaile Átha Cliath, 1990) As cló faoi láthair ach ar fáil i leabharlanna
The Modern Art Collection Trinity College Dublin, curtha i dtoll a chéile ag David Scott (Baile Átha Cliath: Preas Choláiste na Tríonóide Bhaile Átha Cliath, 1989) Ar fáil i Siopa Leabharlainne Choláiste na Tríonóide agus i leabharlanna